Дотоод мэдээ

Худалдааны салбарын борлуулалтын орлого 33.3 хувиар нэмэгдэв

Худалдааны салбарын борлуулалтын орлого энэ оны эхний 4 сард 9.6 их наяд төгрөг болж, өмнөх оны мөн үеийнхээс 2.4 (33.3 хувь) их наяд төгрөгөөр нэмэгдлээ.

Үүнд шатахууны бөөний болон жижиглэн худалдаа 1.2 (60 хувь) их наяд, хүнсний бүтээгдэхүүний бөөний болон жижиглэн худалдаа 376.3 (23.6 хувь) тэрбум, төлбөр эсвэл гэрээний үндсэн дээр хийх бөөний худалдаа 141.2 (30.2 хувь) тэрбум төгрөгөөр нэмэгдсэн нь нөлөөлсөн байна. Худалдааны салбарын борлуулалтын орлого энэ оны 4 дүгээр сард 2.6 их наяд төгрөг болж, өмнөх сарынхаас 23.4 (0.9 хувь) тэрбум төгрөгөөр буурсаныг Үндэсний статистикийн хороо мэдээлэв.

Худалдааны салбарын 2022 оны эхний 4 сарын борлуулалтын орлогын 40.4 хувь нь бөөний худалдаа, 59.6 хувь нь жижиглэн худалдааны салбарт ногдож байна. Жижиглэн худалдааны борлуулалтын орлого энэ оны эхний 4 сард 5.7 их наяд төгрөг болж, өмнөх оны мөн үеийнхээс 1.4 (31.3 хувь) их наяд, харин бөөний худалдааных 3.9 их наяд төгрөг болж, өмнөх оны мөн үеийнхээс 1 (36.4 хувь) их наяд төгрөгөөр нэмэгдлээ.

Худалдааны салбарын борлуулалтын орлого энэ оны 4 дүгээр сард өмнөх сарынхаас 23.4 тэрбум төгрөгөөр багасахад шатахууны бөөний болон жижиглэн худалдаа 71.3 (8.2 хувь) тэрбум, төлбөр эсвэл гэрээний үндсэн дээр хийх бөөний худалдаа 22.7 (12.1 хувь) тэрбум, хүнс, ундаа, тамхины бөөний худалдаа 17.2 (6.5 хувь) тэрбум, моторт тээврийн хэрэгслийн жижиглэн худалдаа 17 (36.4 хувь) тэрбум төгрөгөөр багассан нь нөлөөлсөн аж.

Худалдааны салбарын борлуулалтын орлого энэ оны эхний 4 сард Төв аймагт өмнөх оны мөн үеийнхээс 2.1 дахин нэмэгдсэн бол бусад аймагт 8.4-75.3 хувиар нэмэгджээ. Харин Өмнөговь аймагт энэ оны эхний 4 сард өмнөх оны мөн үеийнхээс 4.2 хувиар багассан байна.

Related Articles

Хариулт үлдээх

Таны и-мэйл хаягийг нийтлэхгүй.

Back to top button